Azken txanpan sartu dira Beizaman aurtengo sanpedroak, baina oraindik ere, iluntzera artean, ospakizunekin jarraituko dute. Eguerdira artean, gaztetxoen pilota partidak eta artisauen azoka izan dituzte, herriko umeen postu eta guzti; eta dena trikiti doinuek girotuta.
Arratsaldean, berriz, 18:30etik aurrera, bi aizkora desafiok hartuko dute herriko plaza: alde batetik, Eneko Otaño eta Mikel Larrañaga arituko dira nor baino nor. Bestetik, Karmele Gisasolak Nerea Arrutiren aurka jokatuko du. Iluntzean, jai amaierako afariarekin eta su festarekin agurtuko dituzte sanpedroak.