Auto klasikoen Azpeitia Hiria rallyaren 23. edizioan parte hartzen ari diren 75 autoek 11:00etan irten dute banaka, Azpeitiko epaitegiaren aurreko aparkalekutik. Irten aurretik autoak bertan izan dira ikusgai, eta jende asko bildu da ibilgailuak ikustera. Maykel del Ciden omenezko rallya Lagun Artea eskuderiak antolatu du.
230 kilometroko ibilbidea osatu beharko dute auto klasikoek Gipuzkoako errepideetan barrena: Azpeitia, Bidania-Goiatz, Orendain, Salbatore jatetxea (20 minutuko geldialdia), Mandubi, Gabiria, Legazpiko Aitxuri jatetxea (14:00etan, bi orduko geldialdia), Mutiloa, Abaltzisketa, Aia, Zarautz (18:00etan, ordubeteko geldialdia), Meaga eta Azpeitia. 20:00etarako aurreneko autoa Azpeitian izango dela aurreikusi dute rallyaren antolatzaileek. Behin auto denak iritsitakoan sari banaketa egingo dute epaitegiaren aurreko aparkalekuan.