Ion Etxeberria erremontistak Udaberriko Txapelketa irabazi zuen atzo, Uterga bikote hartuta. Doneztebeko (Nafarroa) Ezkurra frontoia jendez leporaino zela jokatu zuten azpeitiarrak eta doneztebearrak txapelketaren finala, eta Otxandorena eta Barricart izan zituzten aurkari.
Horien akatsak baliatuta, aise irabazi zuten partida; 35 eta 18 izan ziren nagusi Uterga eta Ion. Partida berdintsua izan zen hastapenetan, baina ordutik atzera, dena izan zuten alde kamiseta gorriekin jokatu zuten erremontistek.
Arrazoi pertsonalengatik finala jokatzerik izan ez zuen Agirrezabala azpeitiarra ordezkatu zuen atzokoan Ionek, eta ez zuen hutsik egin; beste txapel bat poltsikoratu du.