Jexux Zelaiak Euskal Herriko Igoera Bertikalen Kopako asteburuko lasterketa irabazi du 56 urtetik gorakoen Master C kategorian. Herenegun, igandez, jokatu zuten lasterketa Izaban (Nafarroa), Euskal Mendizale Federazioak antolatuta, eta Ardibidepikua Bertikala osatu behar izan zuten han lasterkariek, 3,2 kilometro eta 800 metrotik gorako desnibela duen ibilbidea. Orotara 43 minutu eta 18 segundo behar izan zituen Zelaiak ibilbide hori osatzeko, eta bere kategorian azkarrena izan zen.
Irailean eta urrian jokatuko dituzte Euskal Herriko Igoera Bertikalen Kopako azken bi lasterketak, eta haietan izango da Azpeitiko mendi korrikalaria, denboraldiari amaiera ematen.