Gipuzkoako Foru Aldundiaren Treba Nerabeak programaren baitan, ongizate emozionala lantzeko doako bi saio egingo dira Azpeitiko Basazabal jauregian, lehenengoa apirilaren 11an eta bigarrena maiatzaren 16an, biak ala biak 17:00etatik 19:00etara. 12 eta 16 urteko nerabeek izango dute parte hartzeko aukera, eta apirilaren 9ra arteko epea izango dute izena emateko.
Gipuzkoako nerabeei beren ahalduntze prozesuan laguntzea da Treba Nerabeak programaren helburua, eta ongizate emozionalari buruzko lanketa ekarriko du Azpeitiko saioetara. Apirilaren 11koan, Leire Urra eta Carol Palacio izango dira hizlariak, eta maiatzaren 16koan, berriz, kuadrilletako saltsen inguruan arituko da Beñat Benitez.
Azpeitiko Udalak ohar batean jakinarazi duenez, harremanak izateko dituzten moduei buruzko hausnarketa egingo dute nerabeek, kuadrilla ardatz gisa hartuta.
Gazteentzat eta gurasoentzat ere bai
Gurasoei eta 17 eta 24 urte bitarteko gazteei bideratutako saioak ere baditu Trebak, eta horiek ere eskainiko dira Azpeitian. Hala, Treba Gazteak programaren barruan, begirada kritikoa landuko dute gazteek, bi saiotan: maiatzaren 16an eta 30ean, 17:00etatik aurrera.
Lehen saioa orokorra izango da, eta Udalak aurreratu duenez, "gorroto-diskurtsoen, diskurtso diskriminatzaileen eta ukatzaileen inguruan eraikitako ikaskuntzak lantzeko eta pentsamendu kritikoa eta narratiba alternatiboak kolektiboki eraikitzeko" ahalegina egingo dute, InteRed erakundeko kideekin. Maiatzaren 30ean, berriz, fake news-ak landuko dituzte, Bitargiko Ainhoa Arruabarrenarekin.
Azkenik, Treba Gurasoak programaren barruan, Elikadura Jarrera Osasungarriak hitzaldia eskainiko du Mireia Centenok maiatzaren 21ean.