Maialen Azpiazuk eta Eider Bereziartuak beste urrats bat egingo dute triatloiaren munduan: batek Azkoitiko Azkoitri taldea eta besteak Zumaiako Triatloi Taldea utzi dituzte, eta Bizkaiko Peñota Dental Alusigma triatloi taldean ariko dira aurrerantzean. Talde horrekin maila handiko probetan aritzeko aukera izango dute bi azpeitiarrek, maila handiko kirolarien aurka.
Peñota Dental Alusigma taldeak azaldu duenez, 2025. urteko denboraldian emakumeen taldea indartu nahi du, probetan ere ikusgarritasuna handituz. Horretarako, zortzi emakume fitxatu ditu, tartean Azpiazu eta Bereziartua. Azpiazuk Espainia mailako triatloi probetan lehiatzen jarraituko du, maila handiko kirolariekin, eta Bereziartuak ere proba horietan lehiatzeko aukera izango du, Arabako, Bizkaiko eta Gipuzkoako probetatik haratago joanez.
Julen Lopetegi triatleta azpeitiarra ere Peñota Dental Alusigma taldearekin aritzen da lehian.
