Etxeko bi pilotari mendean hartuta, Utergak eta Mitxeok irabazi dute Azpeitiko 23. Erremonte Txapelketa. Bikote horrek atzo jokatu zuen finala Izarraitz pilotalekuan, Matxin III.aren eta Agirrezabalaren kontra, eta gutxigatik, baina garaipena eskuratu zuen: 35 eta 33 nagusitu ziren Uterga eta Mitxeo.
Finalaren aurretik, ordea, hirugarren eta laugarren postuak izan ziren jokoan. Mikelarenak eta Ionek Otxandorenaren eta Otanoren aurka neurtu zituzten indarrak –lesioak tarteko aldatu zituzten bikoteak atzoko jardunaldirako–, eta hirugarren postua Mikelarenarentzat eta Ionentzat izan zen, 24 eta 30 nagusituta.
Aurtengoan txapelketari buelta bat eman diote, eta ohi baino dezente laburragoa izan da lehia. Bi ostiral arratsaldetarako jarritako hitzorduetan jokatu dituzte partida guztiak: finalaurrekoak joan zen ostiralean eta finala nahiz hirugarren eta laugarren postuak erabakitzeko partida.
Gainera, aurtengoan e-Remonte enpresako kirolariek jokatu dute txapelketa; azken urteetan, urtez urte txandaka aritu dira e-Remonte eta Oriamendi enpresetako pilotariak Azpeitiko txapelketan. Aurtengo hitzorduei esker lortutako irabazi guztiak Valentziara bidaliko dituzte, denboraleak eragindako kalteei aurre egiteko.