Kilometroen eta Gukaren elkarlanaren erakusle, Gukak bere txokoa izango du Kilometroen egunean. Hain zuzen ere, merchandasing-a, komunikazio taldearen argitalpenak, haurrentzako jolasak, karetak egiteko aukera... eskainiko du txoko horretan. Ikasberri ikastolaren atarian jarriko du Gukak txokoa, Jesus-Maria komentuaren parean, goizez eta arratsaldez. Herritar guztiak gonbidatuta daude gunea bisitatzera eta Gukaren berri bertatik bertara jasotzera.
Galdera-erantzunen jolasaren irabazleak
Kilometroen harira, galdera-erantzunen jolasa izan da martxan azken astean Gukaren hedabideetan. Herritarrek kilometroen inguruan zenbat dakiten erakutsi behar izan dute ariketaren bidez, eta galdera guztien erantzunak asmatu dituztenen artean, sei arropa sorta zozkatu ditu Gukak. Lehiaketa irekia izan da, ez bazkideei soilik zuzendutakoa, eta honako hauek izan dira irabazleak: Garazi Azkune, Koldo Astigarraga, Begoña Aranguren, Hegoi Sudupe, Berezi Amubieta eta Leire Arrojeria. Irabazleek igandean jaso beharko dute saria, Gukaren txokoan (Jesus-Maria komentuaren aurrean).