Artiekin bertako artisauen elkartea azoka ari da egiten gaur, zapatua, Azpeitian. Eguraldia aldakor ibili da goiz osoan zehar, oraintxe argi eta ilun gero, baina Euskal Herriko 27 eskulangilek jarritako postuek plazan buelta bat ematera gonbidatu dituzte herritarrak. Aterruneak baliatuta, asko izan dira goizean goizetik artisauen gaurko eskaintza ezagutzera bertaratu diren lagunak, eta tartean, noski, erosketak ere egin dituzte batzuk.
10:00etan ireki dituzte artisauek postuak, eta 19:00etara arte plazan egongo dira beraien produktuak eskaintzen. Haien postuen artean daude talogileak ere, eta euripeko uneetan zenbait mokadutxoa egitera gerturatu dira. Talogileen alboan, berriz, haurrak protagonista; Ametsen txokoak eskumuturrekoak egiteko tailerra eskaini du, eta dozenaka haur igaro da bertatik berea egitera. Arratsaldean, Getariako Dona Donik eskainiko du izozki tailerra. 17:00etan hasiko da Fernando Alberdiren ikastaroa, eta amaieran, izozki bana emango die hark parte hartzaileei.