Joan den martxoaren 30ean egin zuen Azpeitiko Baigera jubilatuen eta pentsiodunen elkarteak urteko batzar orokorra, eta 27 bazkidek parte hartu zuten bertan. Gainera, han izan zen Estitxu Elduaien Azpeitiko Udaleko Gizarte Zerbitzuetako batzordeburua.
Batzarrean, besteak beste, aurreko urtean elkarteak eginiko ekintzen berri eman zuten. Horrez gain, diru sarreren eta gastuen gaineko informazioa ere eskaini zuten, eta aurrera begira elkarteak dituen asmoez ere aritu ziren hizketan.
Bestalde, zuzendaritza batzorde berria eratu zuten, eta Jesus Olaizola izango da Baigeraren lehendakari berria. Gainera, Mari Karmen Etxaniz izango da elkartearen administraria eta Patxi Alzibar idazkaria. Horiez gain, honako batzordekide hauek osatuko dute zuzendaritza: Kontxi Urrutia, Pello Odriozola, Olatz Arruti eta Lurdes Olaizola.