"Madril-Lisboa zen niretzat denboraldiko azken proba garrantzitsua"

(Eneritz Albizu) Joseba Albizuren (Azpeitia, 1978) MMR-Powerade taldeak irabazi zuen asteburuan Madrid-Lisboa txirrindularitza proba. 31 ordu eta hamasei minutu behar izan zituzten Albizuk eta taldea osatzen zuten beste hiru txirrindulariek lasterketa bukatzeko. 770 kilometro geldialdirik gabe. Nola egiten da hori? Kilometro horiek 10 etapatan banatzen dituzte, eta txirrindulari bakoitzak etapa egin eta taldekideari erreleboa eman behar izaten dio. Horrela, txandaka, hamar etapak egin arte. Etapa egiten ari ez direnek, tokiz aldatu behar izaten dute. Bidaia horiek autokarabanan egiten dira, eta zerbait deskantsatu ahal izaten dugu. Dena den, lo? Gutxi edo batere ez. Lau zineten taldean. Hori aldea izango da proba egiterakoan, ezta? Banaka, binaka, hirunaka edo launaka egin daiteke proba. Hori bai, lehiatzera doazenak, normalean, lauko taldean ateratzen dira. Gu hala atera ginen, eta bigarrenei hiru ordu laurdeneko aldea atera genien. Gustura al zaude lortutakoarekin? Bai. MMR-Powerade taldeak laugarrenez irabazi du. Nik bigarren aldiz hartu dut parte taldearekin, eta gustura nago lortutakoarekin. Zer du berezi proba horrek? Beste probetan ez bezala, gauez eta egunez aritzen zara bizikletan. Esaterako, lehen etapa arratsalde-iluntze partean egin nuen, eta bigarrena goizaldean. Iaz ere irabazi zenuten. Bai. Iaz esprintean irabazi genuen, justu-justu. Aurten, berriz, lasaiago ibili gara lasterketa osoan eta helmugara ere hala iritsi ginen, bigarrenari hiru ordu laurden inguruko aldea aterata. Beste probarik bai jomugan? Ez, Madril-Lisboa zen niretzat denboraldiko azken proba garrantzitsua. Oporrekin pentsatzen hasi naiz dagoeneko, bizikleta aparkatu eta... Deskantsatzeko desiatzen nago.