Azpeitiko alkateak eta Bilduko zinegotziek atzo aurkeztu zuten 2013ko Denon Artean prozesua (Argazkia: Julene Frantzesena)
Bilera irekien egutegia
AUZOKAKOAK
Urtarrilak 14, astelehena.
- Matxinbenta, 19:00etan, Matxinbentako Beheko tabernan.
- Landeta, 19:00etan, Baigera 1-eko aretoan.
Urtarrilak 15, asteartea.
- Garmendi, Pablo VI.a, Artzubia eta Jose Artetxe kalea, 19:00etan, Betharramen.
- Nuarbe, 21:00etan, Nuarbeko elkartean.
Urtarrilak 16, asteazkena.
- Urrestilla, 19:00etan, Urrestillako erretiratuen elkartean.
Urtarrilak 22, asteartea.
- Soreasu, Juan XXIII.a eta Damaso Azkue auzunea, 19:00etan, Soreasun.
Urtarrilak 23, asteazkena.
- Alde Zaharra, 19:00etan, Baigera 1-eko aretoan.
- Lasao, 19:00etan, Lasaoko lokalean.
Urtarrilak 24, osteguna.
- Aratz Erreka, 19:00etan, Aratz Errekako tabernan.
- Loiolabide, 19:00etan, Betharramen.
Urtarrilak 25, ostirala.
- Oñatz, 19:00etan, tabernan.
Urtarrilak 28, astelehena.
- Loiola, 19:00etan, bertako elkartean.
- Etxe Alai, Arana eta Santutxo, 19:00etan, Baigera 1-eko aretoan.
Urtarrilak 29, asteartea.
- Sanjuandegi eta Etxebeltz-Izarra, 19:00etan, Betharramen.
ARLOKAKOAK
Urtarrilaren 30etik hasi eta otsailaren 8ra bitartean. Auzokako bilerak bukatu ondoren, arlokako bilera irekiak deituko ditu Udalak, hil honen bukaeratik hasi eta otsailaren 8ra artean izango dira.
Aurtengo udal aurrekontuak osatzeko Denon Artean prozesu parte-hartzaileko auzokako bilerak abiatuko ditu astelehenean Azpeitiko Udalak. «Gardentasuna eta elkarlana» helburu hartuta abiatuko dute ekimena. Astelehenean bertan hasiko dira herritarrei zuzendutako auzoz auzoko bilerak, eta ondoren arlokakoak egingo dituzte. Horiez gainera, udaletxean ate irekien eguna egingo dute eta bukatzeko, otsailaren 20an, herri kontseilua udal aurrekontuak gai hartuta.
Aurtengo udal aurrekontuen eztabaida bi adar nagusitan banatuta bideratuko du Udalak: alde batetik, udaletik bideratuko den adarra; hau da, udal batzordetan alderdietako udal ordezkariek ekarpenak egingo dituzte, eta udal langileen proposamenak ere jasoko dituzte.
Beste aldetik, herritarrei zuzendutako adarra landuko dute. Kasu honetan, herritarrek zuzenean parte hartzeko aukera izango dute: auzoka eta arloka antolatutako bileretan parte hartuz, herriko txoko desberdinetan udalak jarriko dituen buzoietan ekarpenak eginez edota Azpeitia.net webgunearen bidez parte hartuz.
Erabakiak kontsentsuz
Eneko Etxeberria alkatearen arabera, garai txarrean erabakiak ahalik eta adostasun handienarekin hartzea funtsezkoa da. «Krisiak eragindako egoera gogor honetan, herritarrak gaizki pasatzen ari diren garaian, inoiz baino inportanteagoa da aurrekontuak ahalik eta adostasun handienarekin onartzea. Udalak diruak zertan gastatu edo inbertitu behar dituen diruak ahalik eta kontsentsu zabalenarekin erabakitzea da gure lehentasuna».
Herritarrek eta gizarte eragileek Azpeitiko erabaki estrategikoetan parte hartzeko aukera izan behar dutela uste du alkateak, eta orain abiatuko duten 2013ko Denon Artean prozesuak horretarako baliagarria izan behar duela.
Denon Artean prozesuak Udalbatza ez duela gutxiesten ere nabarmendu du alkateak, «erabakigune zentrala Udal Ogasun batzordea izango da». Ogasun Batzordean bilduko dira herritarrek, eragileek, udal alderdi politikoek eta udal langileek egindako ekarpenak, eta teknikoki bertan aztertuko dira. Bertan, proposamenak aztertu ostean, azken erabakia hartzea Udalbatzari egokituko zaio.
Iazko esperientzia positiboa
Denon Artean prozesua iaz jarri zuen martxan Azpeitiko Udalak. Aurreneko aldi hori «esperientzia positiboa» izan zela azaldu du alkateak, parte hartze handia izan zuelako. «Lehenengo esperientzia Azpeitian abiatutakoa izan zen eta emaitza oso onak izan ziren, herritarren parte hartzea oso zabala izan zelako. Horrek indarra eta sendotasuna ematen dio ekimenari», esan du alkateak. Iaz Denon Artean prozesuan 850 herritarrek hartu zutela parte esan du.
Alkateak azpimarratu duenez, eurek duten lehen helburua udalaren gardentasuna da, «udaleko hormak kristalezkoak izatea da gure nahia: edozein herritarrek gure kontuak eta gure erabakiak ezagutzeko eskubidea eta aukera izatea». Gardentasun horren parte da, herritarrei ere azalpenak ematea. «Beraz, urtero azalpenak jaso eta herritarrek kritika egiteko eskubidea dute era honetara».
Denon Artean prozesuaren bigarren helburua, udala herritarrekin eta eragileekin elkarlanean aritzea dela ere nabarmendu du Etxeberriak. «Herritarrak askotan beste proposamen batzuekin etortzen dira, eta herritarren jakinduria hori kontutan hartzeak eraginkorrago izateko aukera ematen dio udalari. Eta gero eta baliabide gutxiago ditugun honetan, eraginkorragoak izatea da gure apustua».
Krisian egotea «herritarrekin eta herritarrentzat inteligintzeaz gobernatzeko» aukera bat dela ere esan du Etxeberriak. «Dirua dagoenean politika egitea eta gobernatzea erraza da. Zaila dena da, dirurik gabe ditugun azpiegituretako programak betetzea. Horregatik inteligentziaz gobernatzea egokitzen zaigu», gaineratu du.
Azken urtebetean parte hartzea bermatzeko bitartekoak sortu dituztela ere gogorarazi du alkateak: «Auzoalkateak, parte hartzeko ordenantza, kontseilua...».
Antolatutako bilera irekiak autokritika eginez hasiko dituztela, «aurreko urteaz hitz egingo dugu, zer gelditu den egin gabe eta azalduz». Gero, udalaren ustez zer behar dauden azalduko dute; eta, bukatzeko aurtengo udal aurrekontuetarako dituzten irizpideak zeintzuk diren azalduko dute.
