Eguzki talde ekologista kexu azaldu da Azkoitiko Udalak ibaietan eta erreketan dauden hondakin pilaketak prebenitzeko eta gune natural horien egoera zuzentzeko Gipuzkoako Foru Aldundiak aurten zabaldu duen diru laguntza lortzeko eskaera egin ostean, azken erakunde horrek udalaren eskaera baztertu duela jakin eta gero.
Gipuzkoako Foru Aldundiak diru laguntza lerro zabaldu zuenean, talde ekologistak proposamen tekniko bat aurkeztu zion Azkoitiko Udalari, hura diru laguntza lerro horretaz baliatu zedin. Proposamen horrekin batera eskatu zuen talde ekologistak Urola ibaiaren ertzetako barandetan babes saretak jartzea eta ibaiak herrian duen ibilgua garbitzea.
Eguzkik adierazi du udalari martxoan gogorarazi ziola ibaia babesteari eta garbitzeari buruz aldundiari aurkeztu beharreko proposamen teknikoa "zorrotza" zela. "Eguzkik martxoan Alkatetzari eta Ingurumen sailari helarazitako txosten teknikoak erabateko zehaztasunarekin ohartarazten zuen diru laguntza soilik prebentziorako eskatzeak gehienez ere hamar puntu ematen zizkiola udalari. Sareak jartzea ibaia garbitzera bideratuko zen eskaera bateratu batean sartzeko eskatu genion udalari". Eguzkiren arabera, udalak proposamena modu bateratuan aurkeztu izan balu, 45 puntu lortzeko aukera izango zukeen, baina erakundeak diru laguntza eskaera "bereizita" egin duenez, ez du laguntza lortzeko beste puntu batu. "Aurreikusita zegoen porrotera kondenatu zuen eskaera udalak".
Eguzkiren arabera, udalak "ukapen hori bera" baliatu du "aitzakia gisa" aurrekontuetan adostutakoa ez gauzatzeko. Izan ere, hark gogoratu du aurtengo aurrekontuetarako udalak 18.000 euroko partida hitzartu zuela oposizioarekin, ibairen ondoko barandetan prebentzio neurriak jartzeko, baina ituna "berriz urratu" duela salatu du elkarteak; zehazki, Altzibarko 41 zenbakiko aparkalekutik Juin kalea eta Azkoitia-Azpeitia bidegorriarekin lotzen duen tartean, 170 metro baranda "babestu gabe" utzi zirela azaldu du hark.
Honen aurrean, Eguzkiri ere arreta handia deitzen dio honakoak: "Nola da posible udalak ziurtatzea 'hurrengo ekitaldirako kontuan' izango duela? Noiz, eta Eguzkik berak txosten teknikoan ohartarazi zion bezala, aldundiaren beraren ebazpenak 25,14 puntuko emaitza barregarria eman zionean eta espresuki ohartarazi zionean 7. oinarriko 2. klausulan ezarritakoaren arabera, ez direla diruz lagunduko 40 puntura iristen ez diren jarduketak". Ekologisten arabera, "formula oker eta alferrikako bera" errepikatzen saiatzeak "agerian" uzten du "etorkizunerako egindako ustezko promesa hori" ez dela "aitzakia huts bat", baizik eta "kudeaketako gaitasunik ezaren sintoma nabarmena".
"Jauzi kualitatiboa"
Ordea, udalaren "aitzakia" bertan behera gelditu da zera egiaztatzean: "Gutxienez maiatzaren erdialdetik, jada 360 metro jarrita daude Juin kalea Azkoitia-Azpeitia bidegorriarekin lotzen duen bidean, udalak aurrekontuetan adostutakoaren zati bat horrela betez. Honek frogatzen du lana ez zegoela inoiz foru diru laguntza baten menpe, eta orain, Eguzkik egindako ohartarazpen teknikoen kontrako izapidetze baten ondoriozko ukapenean babestea, osoko bilkurako akordioei iseka egitea da".
Era berean, bereziki "larria" jo du udalak eman duen "jauzi kualitatiboa": haren arabera, gobernagarritasun propioa ziurtatzeko "funtsezkoa" den aurrekontu itun bat "instrumentalizatzeak eta, ondoren, "gaizki izapidetutako espediente batean babestea exekuzioa ez betetzeak" erakusten du "kudeaketaren benetako izaera".
Egoeraren aurrean, Eguzkik udal gobernuari exijitu dio "administrazio trikimailuak eta fikziozko aitzakiak" erabiltzeari utz diezaiola, eta adostutako aurrekontu konpromisoa "berehala" bete dezala, baita Urola ibaian ipini gabe dauden sareak osorik jar ditzala ere. "Gobernantzaren benetako bikaintasuna ez da Europako zigiluak erakusleiho huts gisa erabiliz frogatzen, baizik eta emandako hitza errespetatuz, diru publikoa eraginkortasunez kudeatuz, Azkoitiko ingurumen babeseko benetako beharrei erantzunez eta hainbeste aldarrikatzen duen etika instituzionala egitateekin erakutsiz".