Aizpurutxo auzoa bere jaiegunetan murgildu da gaur, osteguna. 11:00etan, San Agustin eguneko meza egin dute auzoko San Agustin elizan. Dozenatik gora lagun bildu da han, Aizpurutxo auzoko zaindariaren egunean. Meza ostean, berriz, askok mokadua egin dute auzoko jatetxera jota.
Elizatik ez oso urrun, San Agustin taberna zenaren horman, murala margotzen hasi da Gorka Larrañaga artista azkoitiarra. Dantza gaitzat hartuta, bi horma-irudi margotuko ditu hark taberna zenaren eraikinaren bi alboetan. Zenbait urte egin du atzera Larrañagak irudiak ontzeko, eta dantzarako debekuak hartu ditu oinarri; izan ere, zenbait urtez Elizak debekatuta izan zuen Azkoitian dantza sueltoa egitea. Aldiz, Bergaran (Gipuzkoa) posible zen era horretan dantza egitea.
Hain justu, debeku horri lotutako istorio bitxia jasotzen du Aizpurutxoko San Agustin tabernak. Azkoitia eta Bergara artean dago etxea, sukaldean banatzen dira-eta Azkoitiaren eta Bergararen lurrak –eraikinaren azpitik igarotzen da bi herriak banatzen dituen errekatxoa–. Larrañagak azaldu duenez, eraikin horren Bergarako zatian dantza lotua egiteko aukera zegoen, baina Azkoitiko zatian dantza sueltoa egin zitekeen soilik.
Historia hori aintzat hartuta, artista azkoitiarrak eraikin horren hormetara eramango ditu bi dantza motak. Eraikinaren Azkoitia aldeko horman dantza sueltoan ageri den lagun talde bat margotzen hasi da Larrañaga, eta dantza lotuan ageri den bikote bat margotuko du Bergara aldekoan. Murala zapatuan aurkeztuko du artistak, jaiei lotuta egingo dituzten ekintzetan.
Zapatuko hitzorduak
Urbasoko Marmarrak taldeak antolatuta, hainbat hitzordu izango dira etzi, zapatua, Aizpurutxon. 20:00etan, elizaren paretik abiatuta, ibilaldia egingo dute auzoan zehar. Hitzordu horretan musika, auzoaren historia, olerkiak, ikus-entzunezkoak eta edariak uztartuko dituzte, Aizpurutxoren bestelako ikuspegi bat erakutsi asmoz.
Ibilaldiaren ondoren, berriz, mokadua egiteko eta musika entzuteko aukera izango dira auzoko frontoian. 22:00etan, leku ezberdinetako janaria dastatzeko aukera eskainiko diete auzoan bildutako lagunei, eta 23:00etan, Mozambikeko NBC Gas Butano musikariaren emanaldia izango da.