Udal Gobernu berria nortzuk osatuko duten airean da oraindik Azkoitian, eta EH Bilduk azken astearen balorazioa kaleratu du ohar batean. Koalizioak azpimarratu du "akordio programatikoetan" oinarritzea ezinbestekoa izango dela herriak maiatzaren 28an bozkatutako "aldaketa" gauza dadin. Hain zuzen, koalizioaren "abiapuntua aldaketa gauzatzea" dela azpimarratu du Azkoitiko EH Bilduk, eta akordio programatikoak adosteko saiakeran jarraituko dutela aurreratu dute.
Azken astean zehar alderdi guztietako ordezkariekin bilera egiten saiatu direla adierazi du koalizioak, eta haren arabera, Azkoitia Bai taldeak ez du aldebiko bilerarik egin nahi izan. Ondorioz, akordio programatikorako proposamena idatziz helarazi die. Hurrengo larunbatean, hilaren 17an, izango da Udal Gobernu berria osatzeko udalbatzarra, eta astebeteren faltan, "garaiz" daudela esan du Azkoitiko EH Bilduk, eta ateak ireki dizkie "herri eredu berri baten alde" lan egin nahi duten taldeei eta norbanakoei.