Ados Pilotak Plazaz Plaza txapelketa antolatu du seigarren urtez, eta datorren ostiralean, hilaren 28an, txapelketaren jardunaldietako bat jokatuko dute Aizarnazabalen. 19:00etan hasiko da partida Atari Soro pilotalekuan, eta honako bi bikote hauek arituko dira nor baino nor: Barrokal-Orbegozo eta Aldaregia-Arrastia.
Joan zen abuztuaren 15ean hasi zen txapelketa, eta ordutik bi multzotan banatutako sei bikote ari dira lehian; tartean, ostiralean Aizarnazabalen izango den Oihana Orbegozo azpeitiarra —B multzoa— eta Naroa Agirre zestoarra —A multzoa—. Ligaxka moduan ari dira pilotariak, eta multzo bakoitzeko bikoteek elkarren aurka jokatuko dituzte partidak. Gainera, aurten 30 tantora ari dira jokatzen norgehiagokak. Finala irailaren 12an izango da, Erratzun (Nafarroa).