Irailarekin etorriko dira Aizarnazabalgo festak. Aurrena, hilaren 18an, larunbatez, Euskal Jai eguna ospatuko dute, helduen danborrada eta guzti, eta astebete geroago ekingo diete sanmigelei, hilaren 25eko txupinazoarekin. Udala dagoeneko ari da festetako egitarauan ixten eta egitarauaren barruko jarduerak eta ekitaldiak antolatzen, eta horietako batzuetarako laguntza eskatu die herritarrei.
Hainbat deialdi egin ditu erakundeak. Euskal Jai eguneko danborradan parte hartu nahi duten herritarrei eta egun horretako kalejiran zanpantzar gisa irten nahi luketenei hilaren 31rako izena emateko eskatu die, kultura@aizarnazabal.eus helbidera idatzi. Zehaztu du zortzi lagun behar direla zanpantzar gisa aritzeko, eta gehiagok nahiko luketen kasuan, izen emateko hurrenkera hartuko dutela kontuan.
Bestetik, jaietan egiten duten paella janerako ere jendea behar dela jakinarazi du udalak; paella prestatzeko, zerbitzatzeko zein aurretik eta ondoren egin beharreko lanetarako. Jarduera hori gauzatzen laguntzeko prest dauden herritarrek ere kultura@aizarnazabal.eus helbidera idatzi beharko dute, edo bestela, Idoiari adierazi beharko diote Whatsappez.
Azkenik, hilaren 25eko txupinazoa nork bota erabakitzeko laguntza eskatu du udalak. Herritarren proposamenak jaso nahi ditu, zergatiak azalduta. Herritarrek abuztuaren 31ra arteko epea dute txupinazorako proposamenak udalari helarazteko, eta horretarako ere korreo elektronikoa erabiltzeko eskatu du; beraz, herritarrek kultura@aizarnazabal.eus helbidera idatzi beharko dute.