Aizarnazabalgo umeek ere egin dute Korrika Txikia. Gaur goizean egin dute euskararen aldeko egitasmoa, Lardizabal eskolako ikasleek, eta gogotik gozatu dute. Petoak eta burukoak jantzita aritu dira korrika, Korrikako pankartaren atzean; euskararen aldeko aldarria lau haizetara zabaldu dute txikienek ere.
Aizarnazabaldik ez da pasatuko 24. Korrika, baina hango udalak nahiz EH Bilduk kilometroak erosi dituzte. Ondorioz, bihar, larunbatez, bi eragile horien izenean lekukoa eraman ahal izango dute izena eman duten herritar denek Lasao inguruan; horiek Aizarnazabal ordezkatuko dute aurtengo Korrikan. Izan ere, bihar iritsiko da Korrika Urola Erdira, eta Errezil, Azpeitia, Azkoitia nahiz Zestoatik igaroko da.
Aizarnazabal Biziberritzen egitasmoko kideek Lasaora joateko deia egin diete herritarrei, eta gainera, hango industrialdera kotxez joateko juntadizoa jarri dute: 16:30ean elkartuko dira Aizarnazabalgo udaletxearen aurrean, eta autoak beharko direla adierazi dute.