Etxeko ordezkari bat nagusi izan da Aizarnazabalgo XV. Uztarri Motzeko Idi Probetan. Ostiralean, zapatuan eta atzo jokatu dituzte idi bakarrarekin jokatutako probak. Jardunaldi bakoitzean hiru lehiakide aritu dira, bederatzi guztira, eta atzo, hirugarren eta azken egunean, lehiatu zen Etxabe Palazioren idia izan da markarik onena egin duena: 46 plaza. Horrenbestez, Aizarnazabalgo idizalearentzat izan da etxeko manta. 600 kilo pisatu zituen Etxabe Palazioren idiak eta, horrenbestez, gainkargarik gabe egin zituen lanak, Iñaki Urrutia eta Jon Peña itzaiek gidatuta.
Eskualdeko beste ordezkari bat, Errezilgo Txokolate, sailkatu da bigarren tokian, eta Bermeoko (Bizkaia) Asier Alegria hirugarrenean. Aizarnazabalgo beste lehiakidea, Enbil, zazpigarren sailkatu da.
Hona hemen Aizarnazabalgo XV. Uztarri Motzeko Idi Proben sailkapena:
- Etxabe Palazio (Aizarnazabal): 46 plaza.
- Txokolate (Errezil): 45 plaza, sei zinta eta 1,94 metro.
- Asier Alegria (Bermeo, Bizkaia): 45 plaza eta 2,34 metro.
- Erkoreka (Laukiz, Bizkaia): 45 plaza.
- Mendigoiti (Eibar, Gipuzkoa): 42 plaza eta 1,83 metro.
- Elorrieta (Laukiz, Bizkaia), 40 plaza.
- Enbil (Aizarnazabal): 38 plaza, zazpi zinta eta 2,88 metro.
- Garaiar (Oiartzun, Gipuzkoa): 36 plaza, zazpi zinta eta bi metro.
- Igeldo (Igeldo, Gipuzkoa): 35 plaza eta 1,57 metro.