Emakume bat eta gizon bat atxilotu dituzte, Aizarnazabalgo hilketarekin lotuta. Ertzaintzak uste du 32 urteko emakume donostiarraren hilketarekin zerikusia dutela bi pertsona horiek. Gaur egin dute atxiloketa, Gipuzkoan. UROLA KOSTAKO HITZAk baieztatu ahal izan duenez, gertaeren lekuara eraman dituzte atxilotuak gaur.
Epailearen aginduz, sekretupean dago kasua, eta Eusko Jaurlaritzaren Segurtasun Sailaren komunikazio zerbitzuek jakinarazi dutenez, ez dute emango atxiloketaren edo ikerketaren inguruko xehetasunik. EFE agentziaren arabera, dena den, biktimaren "gertukoak" dira atxilotutako pertsonak.
Era berean, Josu Erkoreka Segurtasun sailburuak adierazi du "ikerketak bere denbora" behar duen arren, "oso jauzi garrantzitsua" eman dutela gertatutakoa argitzeko.
Hasiera, urtarrilaren 4an
Urtarrilaren 4an, emakume baten gorpua aurkitu zuten Aizarnazabalen, indarkeria zantzuekin. Inguruan lanean ari ziren pertsona batzuek aurkitu zuten gorpua, eta 11:00 aldera eman zioten abisua Ertzaintzari. Hurrengo egunean baieztatu zuten norena zen gorpua: egun batzuk lehenago desagertutako 32 emakume donostiarrarena, hain zuzen ere. Urtarrilaren 1ean jarri zuen desagerpenaren salaketa haren bikotekideak.
Aizarnazabalgo landetxe batean ostatu hartuta zegoen biktima, eta handik gertu aurkitu zuten haren hilotza. Landetxe horretan bertan, gainera, Ertzaintzak hogei pertsona identifikatu zituen Urtezahar gauean legez kanpoko festa bat antolatzeagatik —eskualdeko zenbait lagun zeuden bertan—, eta Ertzaintza ikertzen aritu da ea hilketak festa horrekin lotura izan dezakeen ala ez. Gaur-gaurkoz, ez dute baieztatu atxilotuek festarekin zerikusirik dutenik.