Aiako Pala Taldeak antolatuta, IV. Pala Txapelketa Mistoa jokatuko dute hilabete honetan. Txapelketa abenduaren 16ko astean hasiko da, eta urtarrilaren lehenengo astean amaituko dira; finala, urtarrilaren 4eko arratsaldean jokatuko dute.
Bi mailatan banatuko dira pilotariak, hala nola, 14 urte bitartekoak eta 15 urte edo gehiagokoak. Bikoteka edo banaka eman daiteke izena, eta gutxienez bikoteko jokalari batek Aian erroldatuta egon beharko du.
Partidak set erara jokatuko dira, txikienen mailan 4aren barruan, eta nagusienen mailan, aldiz, 5aren barruan. Jokalariek erabiliko duten pilota tenisekoa izango da.
Sariei dagokienez, parte-hartzaile guztien artean hainbat opari zozketatuko dituzte. Bestalde, txapeldun eta txapeldungaiek beraien sariak izango dituzte, eta ondorioz, zozketatik kanpo geratuko dira.
Izena emateko epea bihar amaituko da, eta horretarako 943-13 09 24 zenbakira deitu edo aiakoke20@gmail.com helbidera idatzi daiteke.