Uda sasoirako eskuzko pilota eta pala txapelketak antolatu ditu Aiako Kirol Elkarteak

Andrea Zipitria 2024ko mai. 28a, 14:00

Eskuzko pilota eta pala txapelketak jokatuko dituzte Aian, udan. Bertan parte hartzeko, gaur ireki dute izen-ematea; eta horretarako aukera izango da ekainaren 5era arte. Pala txapelketako finalak uztailaren 31n jokatuko dira, eta eskuzko pilota txapelketako finalak, berriz, abuztuaren 7an izango dira, herriko jaietan, hain zuzen.

Uda sasoirako ohikoa bilakatu diren eskuzko pilota eta pala txapelketak jokatuko dituzte Aian, herriko kirol elkarteak antolatuta. Izen-ematea gaur bertan irekiko da, eta horretarako aukera luzatuko da ekainaren 5era arte. Herritarrak parte hartzera animatu dituzte, txapelketa irekiak izango baitira; hori bai, bikotekako lehian parte-hartzaileetako kide batek, gutxienez, aiarra izan beharko du, eta bakarkakoan aiarrek soilik parte hartu ahal izango dute.

Hona hemen txapelketa bakoitzeko xehetasunak:

Eskuzko pilota txapelketa

Eskuzko pilota txapelketa sei kategoriatan banatuko dute: Mutiletan 10 urte artekoak, 11- 15 urte bitartekoak eta 16 urtetik gorakoa; azken hauek banaka lau t' erdian edo binaka arituko dira. Nesken lehian, berriz, bi adin-tarte zehaztu dituzte: 13 urte bitartekoak eta 14 urtetik gorakoak.

Pala txapelketa

Pala txapelketan mutilak binaka edo banaka lehiatuko dira. Binaka hiru adin-tarte zehaztu dituzte: 10 urte bitartekoak, 11-15 urte artekoak eta 16 urtetik gorakoak. Dena dela, nagusienen kategorian bi maila –lehenengo maila eta bigarren maila– zehaztu dituzte eta parte hartzaileek izena ematerakoan zehaztu beharko dute zer mailatan jokatu nahi duten. Gizonezkoen banakako lehian, berriz, 16 urtetik gorakoak arituko dira. Nesken mailan ere hiru kategoriatan banatuko dute lehia, aurretik azaldutako adin tarteen arabera.

Izen-ematea

Txapelketetan parte hartu nahi dutenek kultur etxean, 943 13 09 24 telefono zenbakira deituta edota aiakoke20@gmail.com helbidera idatzita eman dezakete izena, ekainaren 5era bitartean. Hala, antolatzaileek zehaztu dute bikoterik eduki gabe ere eman daitekeela izena, eta antolakuntza saiatuko delako bikotea bilatzen.

Kategoria guztietan set erara jokatuko dituzte partidak. Pala txapelketako finala uztailaren 31ean jokatuko da eta esku pilotakoak abuztuaren 7an goizez, San Donato eta San Lorentzo jaien egitarauaren barruan.

Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide