Indarkeria matxistagatik ezarritako urruntze agindua urratu zuen gizon batengandik ihesi zihoala, 37 urteko emakume bat hil zen igande goizaldean Iruñean eraikin bateko hirugarren solairutik erori ostean. Zumaiako Mugimendu Feministak deituta, hilketa matxista salatzeko elkarretaratzea egin dute gaur arratsaldean Saregile plazan.
Amorrua eta mina adierazteaz gain, biktimaren senideei eta lagunei elkartasuna nahiz babes osoa adierazi diete bertaratu direnek. Era berean, Mugimendu Feministak gogora ekarri du urtea hasi denetik Euskal Herrian izandako hirugarren hilketa matxista dela honakoa, eta beste behin azpimarratu dute emakumeek pairatzen duten indarkeria egiturazkoa dela.
Zumaiako Udalak ere gogor salatu du gertakaria, eta adierazi du herritar guztien ardura dela indarkeria matxistaren aurrean "jarrera aktiboarekin jokatzea". Bide batez, elkarretaratzean parte hartzera deitu ditu herritarrak.