Larunbat goizean hasita, Ibai-Ondo Backyard ultramaratoi gogorraren bigarren edizioa jokatu zuten Usurbilen (Gipuzkoa). 121 korrikalarik parte hartu zuten, eta Igon Mantzizidor Zumaiako bizilagunak bigarren sailkatzea lortu zuen. 43 ordu eta 25 minutu egin zituen korrika, eta 43 itzuli eman zizkion joan eta etorriko ibilbideari, orotara 288 kilometro baino gehiago osatuta.
Ibai-Ondo Backyard proba ez da ohiko lasterketa, kirolari bakoitzaren gorputzak agintzen baitu non den helmuga. Parte hartzaileek ahal bezain beste itzuli eman behar diote 6,7 kilometroko ibilbideari, eta gehienez ere 60 minutu izaten dituzte itzuli bakoitza osatzeko, bestela, lehiatik kanpo geratzen dira. Funtsean, amore ematen azkenak irabazten du proba.
Aurtengoan, Meltxor Iza iruindarrak erdietsi du garaipena: 44 ordu egin zituen korrika, Mantzizidorrek baino bat gehiago, 295 kilometro guztira.