Zumaiako Udalak jakinarazi du igande honetan sartuko dela indarrean TAOren udaberriko sistema. Ondorioz, asteburuetan eta jaiegunetan indarrean egongo dira bertakoen guneak. Ekainaren 14ra arte iraungo du horrek, eta iazko bertakoen TAO txartelek balio osoa izango dute.
Txartel berria behar dutenek –erroldan edo ibilgailuaren matrikulan aldaketak egin dituztelako, edota txartela lehen aldiz ateratzeko, besteak beste– udaletxeko Herritarren Arreta Zerbitzuan edo egoitza elektronikoaren bidez eskatu beharko dute txartela.