Maila goreneko beste eskubaloi txapelketa bat jokatuko du Kauldi Odriozola jokalari zumaiarrak. Gaur hasi eta otsailaren 1era bitartean, Europako txapelketa izango da jokoan, Danimarkan, eta Jordi Ribera Espainiako selekzioko hautatzaileak deitutako hemezortzi jokalarien artean izango da Nantes klubeko jokalaria.
Gaur bertan jokatuko dute lehen partida, 18:00etan hasita, eta Serbiako selekzioa izango dute aurkari. Azken urteotan bost aldiz neurtu dira bi taldeak, eta hirutan Espainia izan zen garaile, eta bitan Serbia.
Lehen faseko bigarren partida etzi, larunbatean, jokatuko dute, ordu berean, eta Austriako selekzioa izango dute aurkari orduan. Lehen faseko partidekin amaitzeko, datorren astelehenean, hilaren 16an, Alemaniaren aurka aritu beharko dute.