Hostoen azpian izeneko margolanen erakusketa zabaldu zuen atzo JM Sesma artista zumaiarrak. Sortzaileak azken bi urteetan egindako lanak eskegi ditu Oxford aretoko hormetan, "barneko pentsamenduak hustuz".
Japoniako kontuen jarraitzailea da Sesma, eta hain zuzen ere, aitortu du hango liburu batetik datorkiola izena bildumari: Hagakure liburutik. Hagakure hitzak hostoen azpian esan nahi du japonieraz, eta artistak esanahi hori erabili du metafora bat sortzeko: "Loreak lore izateko hostoen beharra du, eta elikagaiak hostoek hartzen dituzte; hau da, erortzen diren hosto horiek, azpian geratzen direnek, askotan garrantzi handiagoa dute loreek baino".
Gai horri tiraka abiatu zituen Sesmak margolanak, eta emaitzetan, besteak beste, bakardadea eta heriotza irudikatu nahi izan ditu. Pieza gehienak akriliko beltzarekin eginak daude, Sesma ez baita bere artelanetan kolore asko erabiltzekoa; hala eta guztiz ere, erakusketa osatzen duten azken koadroetan koloreen erabilera gero eta ageriagoa da.
Margolanez gainera, telefono bat ere badago aretoaren erdian, "falta den pertsona horri deitzeko" balio duena. Era berean, bi aulki jarri ditu, bata bestearen parean, elkarrizketa bat mantentzeko gonbita egiten dutenak.
"Hauxe da gustatzen zaidana"
Hostoen azpian ez da zumaiarrak bere herrian aurkeztu duen lehendabiziko erakusketa, Haizeak ez du ke guztia eramango mostra zabaldu baitzuen 2022an, leku berean.
Kontatu duenez, hura aurkeztu ondoren hilabete batzuk eman zituen margotu gabe, atsedena behar zuelakoan. Alabaina, sei hilabete eskas igaro ostean, berriro ere sortzeari ekiteko beharra sentitu zuen. "Konturatu nintzen hauxe dela gustatzen zaidana", egin du azpimarra. Urte hartatik gaur arte margotutakoak jarri ditu orain Oxford aretoan, hain justu.
Sesmak aitortu du bere "ihesbidea" dela pintura, "barrenak askatzen" laguntzen diona: "Hitz gutxiko pertsona naiz, eta nire marrazkien bitartez hitz egiten dut".
Hala, abenduaren 14ra arte egongo da bilduma hau bisitatzeko aukera, Oxford aretoan. Astelehenetik ostiralera 18:00etatik 20:00etara bitartean egongo da zabalik; larunbatetan eta igandeetan, berriz, 12:30etik 14:00etara eta 18:00etatik 20:00etara.