Dinastia Etxabe txapelketa abiadura bizian doa. Gaur, osteguna, argituko da nortzuk izango diren lehen bi finalaurrekoak osatuko dituzten bikoteak. Asteleheneko kanporaketetan Amiano-Landa (23 urtez azpikoetan) eta Egurrola-Moto (jubeniletan) garaile izan ziren, eta beren finalaurreko aurkariak gaur jakinaraziko dira.
Nagusien mailan, lehia estua aurreikusten da. Zumaiako Aitzurin, Rekalde-Apeztegia eta Cestau-Lazkoz neurtuko dira, batetik. Lehenbizikoek esperientzia eta palmaresa dute alde -Rekalde buruz burukoko egungo txapelduna da eta Apeztegia iazko 22 urtez azpiko munduko txapelduna-. Cestau-Lazkozek, berriz, indartsu ekin zieten txapelketari, eta beren eskuin biziak erabakigarriak izan ziren lehen partida irabazteko.
Jubeniletan, arreta berezia pizten du Salaberria anaia bikien parte hartzeak. Goizuetarrak Irurtzun klubekoak dira eta elkarrekin jokatzen ohituta daude. Aurrean izango dituzte Nazabal eta Figueroa, azken hau Patxi Ruiz txapeldunaren iloba.