Maila goreneko txirrindularitza proba da Donostiako Klasikoa, eta kirol horretan azken urteotan gertatzen ari den bezala, apenas duten txirrindulariek atsedenerako unerik. Goizeko 11:20ean atera dira txirrindulariak Donostiatik, eta 211 kilometro egin eta gero, Donostiara bueltatuko dira parte hartzaileak.
Eskualdetik eguerdi partean igaro da tropela. Aiatik sartu dira txirrindulariak, Andazarrateko 3. mailako mendia igo eta gero. Behin Aian indarrak hartzeko aukera izan dute, Zarautzerako jaitsierari ekin ondoren. Ziztu bizian egin dute txirrindulariek bidea, eta Zarautz, Getaria eta Zumaia pasatu ondoren, Arroabeko biribilgunean Zestoara hartu dute. Azpeitian Tolosarako bidea hartu dute, bigarren mailako Urrakiko mendia igoz.