Urolaren itsasadarrean bainatzea debekatu zuen uztailaren 15ean Zumaiako Udalak. Eusko Jaurlaritzako Osasun Sailak egindako ur analisien emaitzek eraman zuten udala erabaki horren berri ematen zuen oharra plazaratzera. Hilabete lehenago ere antzerako mezua igorri zuen, eta aurreko urteetan ere izan dira antzerako albisteak.
Horren harira, eta Gukak egindako galderei erantzunez, Osasun Sailak ohar bidez gogoratu du Zumaian bi bainu eremu bakarrik daudela "ofizialki" erroldatuta, Itzurun eta Santiago hondartzak, hain zuzen, eta astero ematen dituela bi eremu horien gaineko bainatzeko gomendioen berri. Jaurlaritzako sailak argitu du, baita ere, errioa ez dagoela bainatzeko eremu bezala erroldatuta eta, horregatik, ez dagoela "ur horietarako indarrean dagoen araudiak ezartzen dituen higiene eta osasun kontrol arrunten mende".
"Erroldatzeko eta baimentzeko, bainatzeko eremu batek 'bainatzeko eremuei alta emateko prozedura' bat igaro behar du, udalak eskatuta, eta bainatzeko uren kalitatearen kudeaketari buruzko 1341/2007 Errege Dekretuan eskatutako irizpideen jarraipen zehatza egin behar da", gaineratu du Osasun Sailak ohar bidez. "Horregatik, erroldatutako eremua ez denez, bainatzea debekatzeko edo ez debekatzeko eskumenak Zumaiako Udalarenak dira", gaineratu du, eta esan du Osasun Sailak ez duela inoiz debekatu Zumaiako itsasadarrean bainatzea, "ez dagoelako aplikatu beharreko legeriak ezarritako kontrolen mende".
Hala ere, itsasadarrean jende asko bainatzen denez, "aparteko moduan", lagin batzuk bildu dituztela ere adierazi du Osasun Sailak, "itsasadarreko uraren kalitateari buruzko informazioa modu prebentiboan lortzeko".
Hori guztia dela eta, Osasun Sailak erroldatu gabeko lekuetan –kasu honetan errioan– ez bainatzea gomendatu du, "aplikatu beharreko legerian ezarritako kontrolak egiten ez diren bainu-eremuak" direlako.