Euskaltel-Euskadi taldearekin arituko da Aitor Agirre denboraldiko azken zatian

Juan Luis Romatet 2025ko uzt. 28a, 12:41

Aitor Agirre. (Utzitakoa)

Euskadi Fundazioko txirrindulari zumaiarrak talde laranjarekin korrituko du denboraldiko azken zatia. Abuztuaren 12tik aurrera jokatuko den Danimarkako Tourren arituko da, besteak beste. 

Aitor Agirre txirrindulari zumaiarrak albiste on bat jaso du. Euskadi Fundazioko talde amateurreko ziklista Euskaltel-Euskadirekin arituko da, stagier gisa, aurtengo denboraldi amaieran. Abuztuaren 1etik aurrera jantziko du Agirrek txirrindularitza talde horren maillot laranja. Harekin batera egin dute salto Gari Ugarte legazpiarrak eta Axel van der Tuuk herbeherearrak.

Euskaltel-Euskadi taldeko kirol arduradun Jorge Azanzak azpimarratu duenez, aipatu txirrindulari hauek aztertzeko erabakia azken bi denboraldietan hartu dute. "Hirurek txirrindulari profesional onak izateko ezaugarriak dituztela uste dut. Garrantzitsua izango da hirurak probatzea, maila berrian nola moldatzen diren ikustea", azaldu du Azanzak.

Agirrek pasa den denboraldi oso ona egin zuela gogoratu du kirol zuzendariak. Lortutako garaipenen artean erlojupeko Espainiako txapelketa izan zen. "Aitor ezohikoa da hemengo lasterketetarako, indartsua, Europa Iparraldean egin ohi ditugun klasikoetarako".

Laugarren urtea du Aitor Agirrek Euskadi Fundazioarekin. Taldearen esanetan, "Ezin hobeto moldatzen da ordekako eta erlojupeko ibilbideetan. Iaz, Espainiako erlojupeko txapeldun izendatu zen eta etapa bat irabazi zuen Bidasoako Itzulian eta Zamorako Itzulian; aurten, Gervais Memoriala irabazi du hirugarren urtez jarraian".

Behin Euskatel-Euskadi taldera pasata, abuztuaren 13tik 17ra bitartean jokatuko den Danimarkako Tourra jokatuko du zumaiarrak.

Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide