Goizeko 10:30ak alderako iritsi dira lehen piraguak Santiagora. Izan ere, handik abiatu dira Urola ibaiaren igoera-jaitsieran parte hartu duten piraguistak. Ur ertzean utzi dituzte piragua, kanoa edo SUPeko ontziak, eta hondarretan ezarritako marraren atzetik abiatu dira gero korrika horien bila, uretara sartzeko.
Behin piraguetara igota, eskoilerari buelta eman eta errioan gora egin dute, ur araztegi parean buelta eman, eta ibaian behera egiteko. Piraguistak Talaipe pareraino heldu dira, han buiari buelta eman, eta berriro ibaian gora egin eta Itsas kiroldegi parean kokatu duten helmugara heltzeko. Guztira, zortzi kilometroko proba egin behar izan dute piraguistek.
Itxas Gain garaile izan da taldekako sailkapenean, eta klubeko piraguistek emaitza bikainak lortu dituzte nork bere kategorian.