Datorren astelehenean, uztailaren 28an, ekingo diote Aitzuri frontoian udako pilota jaialdi mitikoari, Dinastia Etxabe txapelketari. 53. aldia izango da aurtengoa, eta eskuz zein zesta puntan ariko dira parte hartzaileak Zumaiako Kirol Elkarteak antolatutako lehian. Urtero legez, gauez jokatuko dituzte neurketak, 21:00etan hasita, eta jubenilen eta 23 urtez azpikoen afizionatu mailetan banatuko dira partaideak.
23 urtez azpikoen pilotako aurre-kanporaketak jokatuko dituzte txapelketaren lehen egunean, datorren astelehenean. Iluntzeko lehen neurketan, Etxeberriak eta Sotilek osatutako bikoteak Igoak eta Garañok osatutakoaren aurka neurtuko dituzte indarrak; bigarren partidan, berriz, Cestau eta X. Lazkoz Fernandezen eta Albenizen aurka ariko dira.
Bigarren aurre-kanporaketa bi egun geroago jokatuko dute, hilaren 30ean. Apezetxeak eta Santestebanek Egigurenen eta Goibururen aurka jokatuko dute lehen partida, eta bigarrenean Irribarriak eta Elorzek Aranbarri eta Balerdi izango dituzte aurkari.
Bi jardunaldi horietako irabazleek final-laurdenak jokatzeko txartela eskuratuko dute. Fase hori abuztuaren 4an abiatuko dute, eta 23 urtez azpikoak ez ezik, jubenilak ere ariko dira bertan. Azken maila horretan, esaterako, Ramirez, Murua, Figueroa eta Okiñena pilotariak izango dira.
Zesta puntari dagokionez, finalerdietatik hasiko dute txapelketa, abuztuaren 25ean. Erikek eta Urangak osatutako bikoak Celaya eta Oyhenard izango dituzte aurrez aurre lehen partidan; bigarrena, berriz, Cosmek eta Atainek jokatuko dute, Basterraren eta Argoitiaren aurka. Jaialdia abuztuaren 28an amaituko da, bertan jokatuko baitituzte hiru kategorietako final handiak.
Atzo arratsaldean egin zuten jaialdiaren aurkezpen ekitaldia, eta Zumaiako Kirol Elkarteko lehendakari Josu Larrañagak pilotariei eskerrak emateko baliatu zuen tartea. Halaber, Iñaki Ostolaza lehendakari ohiarentzat ere izan zituen esker hitzak: "Urte askoan sekulako lana egin du Ostolazak". Gainera, Zumaiako Udalari ere zuzendu zitzaion Larrañaga: "Zuen laguntzarik gabe ezinezkoa litzateke txapelketa hau antolatzea".
Ondorengoa da txapelketaren egutegia:
