Euskal Trenbide Sareak (ETS) trenentzako aparkaleku berria egingo du Basusta Bidean, eta bihar hasiko da obra horiek burutzen. Hori dela eta, errepideko zirkulazioan aldaketak egongo dira Basusta Bidean, eta eremu horretan dauden zenbait aparkaleku ere ez dira erabilgarri egongo.
Aldaketa horiek urte amaierara arte egongo dira indarrean, eta horren aurrean Zumaiako Udalak eskerrak eman nahi izan dizkie bizilagunei, "ulermenagatik". Halaber, herritarrei eskatu die aldaketak errespetatu eta seinaleztapen berriak kontuan izan ditzaten.