Beste zenbait gairen artean, Arrangoletako zabalguneko hirigintza garapenerako xehetasun azterketaz –proiektua garatu aurretik orubea zehazteko pausoa– aritu ziren hizketan atzo egin zuten otsaileko ohiko udalbatzarrean. Ikusmina sortu zuen gaiak, eta herritarrek goraino bete zuten udalbatzar aretoa, xehetasun azterketaren inguruko xehetasunak bertatik bertara jasotzeaz gain, beren ahotsa entzunarazi nahi izan zutelako. Desadostasunak desadostasun, aldeko zortzi botorekin eta sei zinegotziren abstentziorekin egin du aurrera. Dena den, tentsio uneak bizi izan ziren lan zerrendako puntu horren bozkaketa unean, herritarrak kexu agertu zirelako.
Iñaki Ostolaza alkateak eman zituen hirigintza garapenari buruzko azalpenak. Haren arabera, proiektuak zuzenean eragin dien lur jabeei eta gainerako interesdunei pertsonalki eman zieten proiektuaren berri. Gainera, 2023ko azaroan eman zioten hasierako onarpena proiektuari, eta GAOn argitaratuta, hogei egunez izan da erabakia jendaurrean. Alegazioak aurkeztu zituzten herritarrek, eta otsailaren 14an egin zuen udal arkitektoak alegazio horien inguruko txostena: Promociones Salbide SLren alegazioak ontzat eman zituen hark, eta ezeztatu egin zituen herritarrenak. Dena den, Arrangoleta eremuko bizilagun batzuek lehendik dauden etxebizitzen irisgarritasunari buruz egindako alegazioa ontzat eman du erakundeak, eta beraz, igogailu batekin komunikatutako oinezkoentzat pasabide horizontal bat ezartzeko aukera eman beharko dute.
Abstentzioa eta desadostasuna
Arrangoletako eremuko xehetasun azterketa bozkatzerako hitza hartu zuen Xabier Odriozola EAJren udal taldearen bozeramaileak. Haren hitzetan, 1996an Zumea Ikastolak udalari dohainik emandako lurretatik 1,2 milioi euroko diru sarrera jasotzeko estimazio bat egin du udalak, eta, besteak beste, Itzurunbideko igogailua eraikitzera, Santiago hondartzako arrapala ezartzera eta Moilaberri berritzera bideratuko du diru hori. Odriozolak nabarmendu zuen, ordea, jarduketa hori ez datorrela bat koalizioaren oinarriekin: "EH Bilduren arabera, beharrezkoa da lurzoru publikoa etxebizitza publikoetara bideratzea, eta gainera, ezin da onartu lurzoru publikoa jabe pribatuei saltzea". Horregatik, etxebizitza horiek alokairu publikora edota larrialdiko etxebizitzetara bideratzeko proposatu zuten jeltzaleek. Bestetik, egingo diren 24 etxebizitzak eraikitzen dituztenean pasabidea egitea ontzat eman zuten EAJko kideek, eta Udal Gobernuari eskatu zioten, bide batez, Juan Belmonte 11 eta 13 zebakietan "beharrezko eta oinarrizko hobekuntzak" egiteko, bizilagunekin hitz egin eta adostu ondoren.
Udalbatzarrera joandako herritarrek hautetsiek botoa eman aurretik hartu nahi izan zuten hitza, baina alkatearen nahiz udal idazkariaren arabera, bilkuraren amaieran izaten da horretarako aukera, eta beraz, ordura arte esandakoak ez dira aktan jasotzen. Han bildutakoentzat, baina, alferrikakoa zen botoa eman ondoren eskakizunak egitea, eta Promociones Salbide SLk aurkeztutako proposamena behin betiko onartzea atzeratzeko eskatu zuten. Besteak beste, aipatu zuten Juan Belmonteko 9. atarian bai, baina 11. eta 13. zenbakietan ez dela ibilgailuentzako sarbiderik izango, eta beraz, okerrera egingo lukeela irisgarritasunak.
Egoera konpontzeko, erabakia hilabete bat edo bi atzeratzeko eskatu zuten jabeek eta interesdunek. Dena den, proiektuak aurrera egin zuen, EH Bilduko hautetsien aldeko zortzi bozi esker –bi zinegotzik ez zuten bozkatu–; EAJko ordezkariak abstenitu egin ziren –zinegotzi batek ez zuen bozkatu–.