Gipuzkoako Batek Ligako bederatzigarren jardunaldia Donibane Ziburun jokatu zuten atzo, eta emaitza politak lortuta etxeratu ziren eskualdeko ordezkariak. Infantil mutiletan getariarrak izan ziren azkarrenak, eta hirugarren sailkatu ziren oriotarrak; infantil nesketan, berriz, zumaiarrek aurrena egin zuten, zarauztarrek bigarren eta oriotarrek hirugarren.
Promesetan, Orioko mutilek bigarren egin zuten eta neskek hirugarren; eta absolutuen mailan ere hirugarren bukatu zuten Orioko mutilek.
Guztira, Orioko hamar batelek parte hartu zuten atzoko estropadan, Zumaiako zortzik, Zarauzko bostek eta Getariako hiruk.
Gaur Getarian jokatzekoak ziren batel estropada, berriz, bertan behera utzi dute, haize handiegiagatik.