Zesta-puntako Banakako Txapelketaren final-laurdenak jokatu zituzten ostegunean Berriatuan. Hainbat baja tarteko, Imanol Lopezek Unai Lekerikaren aurka neurtu zituen indarrak finalerdietako txartela lortzeko, eta halaxe egin zuten bi setetan irabaitz, 12-9 eta 12-4.
Lehengo seta lehiatua izan zen, oso berdindua. Lekerikak ondo jokatu zuen, eta pilota bizixeagoarekin min eginez eskuinarekin, Lopez pasatzea lortu zuen. Aurrean aukera izan zuenean, ondo amaitzen zuen tantoa, batez ere txapa gainean dejadak eginez. Baina Lopezek bere jokoa erakutsi zuen pilotalekuan. Baliabide gehiago dituela nabarmenduz, lehenengo seta aurrera ateratzea lortu zuen (12-9).
Bigarrenean, Lopezek Lekerika menderatu zuen hasieratik amaieraraino. Izan ere, pilota motelagoarekin errebesez jaun eta jabe izan zen. Tantoak amaitzen ere ondo aritu zen zumaiarra,aurrealdean nahiz errebotean. Aise irabazi zuen bigarren jokoa (12-4).
Finalerdiak abenduaren 30ean, datorren ostegunean, jokatuko dira Berriatuko Mendibarren pilotalekuan, 21:00etatik aurrera. Lopezek Ladouche izango du aurkari; beste finalerdia Arberen eta Erkiagaren artekoa izango da.
Gaur, zesta-puntako errebantxa Aitzuri frontoian
Munduko Kopako finala orain hilabete jokatu zen Mexikoko Zinacantepec herrian, Tolucan. Azaroaren 20a zen, eta Erkiaga eta Lopez ziren faboritoak, udako sasoi bikaina egin ostean, baina irabazleak Goikoetxea eta Lekerika izan ziren azkenean, 10-15, 12-15 irabazita. Pilota biziarekin, dozena erdi sake atera zituen errebotera Goikoetxeak.
Gaur arratsaldean, 17:30ean hasita, etxean ariko dira Osa Goikoetxea eta Lopez, eta orain hilabeteko partidaren errebantxa jokatuko dute.
Estelarraren aurretik, lau zumaiar aterako dira Aitzuri frontoira partida jokatzera. Hiru jokalari, gainera, anaiak dira: Cosme, Eduardo eta Gonzal Agirre. Unai Uranga izango da jaialdian jokatuko duen laugarren herritarra. Norgehiagoka horretan, Eduardo eta Cosme Agirre, Gonzalo Agirre eta Unai Urangaren aurka ariko dira.
Sarrerak Turismo Bulegoan daude salgai 10 euroan, eta partidaren aurretik frontoiko leihatilan erosteko aukera egongo da.
Kirol saio horretara sartzeko COVID-19 ziurtagiria eta NA erakutsi beharko dira. Eta beharrezkoa izango da jaialdian zehar maskara une oro jantzita edukitzea.