Lekeitioko gizonezkoen 42. eta emakumezkoen 10. banderen estropadak jokatu dituzte gaur goiz-eguerdi partean hainbat euskal traineruk, asko eta asko goiko mailetan lehiatzen direnak, denboraldi berrirako test moduan baliatuta. Urola Kostatik bost ontzi aurkeztu dira hitzordura, eta denetariko emaitzak izan dira batzuentzat zein besteentzat.
Orioko emakumezkoek zapore gozoarekin bukatu dute gaurko jardunaldia,aurreko bi urteetako dinamikarekin jarraitzen dutelako, beraien arraunketa serioa eta dotorearekin. Izan ere, denboraldi-aurrea garaipen batekin hastea beti ematen duelako konfiantza handia: Lekeition, Donostiarra eta Hondarribia baino gehiago izan dira, 9 eta 13 segundoko aldea atera diete, eta bandera irabazi dute. Zumaiako neskak ere fin aritu dira, eta lan txukuna baten ondoren, seigarren postuan sailkatu dira, Donostia Arraun Lagunaken atzetik.
Gizonezkoei dagokienez, Orio izan da eskualdeko ontzirik azkarrena. Azken txandan aritu dira, Hondarribia, Zierbena eta Urdaibairekin batera, baina haizeak arrotz jo du estropadan zehar, eta gorabeherak egon dira. Azkenean, oriotarrak laugarren izan dira, baina aurreko txandan aritu den Donostiarrak denbora hobea egin duenez, bosgarren bukatu du sailkapenean.
Bigarren txandan nagusitasunez aritu den Getariak eskuratu du seigarren postua, eta Zarautz Gesalaga Okelanek, berriz, hamaikagarren amaitu du saikapen orokorrean; zarauztarrak hirugarren txandan lehiatu dira, Donostiarra, Ondarroa eta Lekittarrarekin, eta azkenak iritsi dira helmugara.
Edonola ere, test estropata izan da gaurkoa, eta norbere ligak hasteko aste batzuk falta dira. Beraz, oraindik eskifaia puntuan jartzeko denbora izango dute eskualdeko arraun taldeek.
Emakumezkoen sailkapena
1. Orio AE 11:38,50
2. Donostiarra 11:47,95
3. Hondarribia 11:52,03
4. Tolosaldea 11:57,67
5. Donostia Arraun Lagunak 12:05,65
6. Zumaia 12:13,19
7. Ondarroa 12:23,75
8. San Juan 12:24,97
9. Hibaika 12:31,86
10. Deusto 12:35,12
11. Lekittarra 12:56,57
Gizonezkoen sailkapena
1. Hondarribia 21:25.08
2. Zierbena 21:31,03
3. Urdaibai 21:38,84
4. Donostiarra 21:49,11
5. Orio AE 21:59,19
6. Getaria 22:06,36
7. Ondarroa 22:13,78
8. San Pedro 22:18,33
9. Kaiku 22:29,96
10. Lekittarra 22:34,84
11. Zarautz Gesalaga Okelan 22:43,85
12. Portugalete 22:46,65
13. Deusto 22:55,95
14. Busturialdea 23:12,68