Atzo, osteguna, eman zuen udalak herrian gertatutako sexu erasoaren berri. Gizon batek emakume bati eraso zion aurreko asteburuan, eta erasoa salatzeko elkarretaratzera deitu zuten udalak eta Zumaiako Mugimendu Feministak. 19:00etan hasi da protesta isila Beheko Plazan, eta adin guztietako jendea bildu da; herrian aspaldian egindako mobilizaziorik jendetsuena izan da.
Ordu horretan ateak ixtea erabaki dute herriko zenbait tabernak, mobilizazioarekin bat egiteko. Elkarretaratzeak iraun duen bitartean itxita egon dira, besteak beste, Metro, Taosa, Leize, Inpernupe, Goiko eta Nikol tabernak.