Bertsozale Elkarteak jakinarazi duenez, erabakita dago jada Gipuzkoako Eskolarteko Txapelketako finalerako seikotea. Sei finalistetatik lau dira Urola Kostakoak; hain zuzen, Amets Aizpurua getariarra, Joar Garate zumaiarra, Naia Arrizabalaga azkoitiarra eta Nerea Isusi zarauztarra.
Aizpuruak atzo abestu zuen sariketako laugarren eta azken kanporaketan, eta saioa irabazita, finalerako azkeneko txartela eskuratu zuen zuzenean. Uxue Ostolaza zarauztarra ere aritu zen Arrasaten jokatutako azken kanporaketa horretan, baina ez zuen azken lehiarako sailkatzea lortu.
Maiatzaren 28an izango da Gipuzkoako Eskolarteko Txapelketako finala, 19:00etan Urnietako Saroben. Eskualdeko lau bertsolari gazteez gain, Ekain Tolaretxipi eta Jon Mendiluze ariko dira txapela eskuratzeko azken lehian. Bertaratzeko asmoa dutenek gonbidapen txartela hartu beharko dute bertsozale.eus atarian, ondoko lotura honetan.