Beste baheketa masibo bat jarri du martxan Eusko Jaurlaritzako Osasun Sailak: martxoaren 31tik Urberu sagardotegian egon direnei eskatu die PCR proba egiteko. Debako Elorriaga auzoan dago sagardotegia, Itziarren, baina jende ugari joan ohi da eskualdetik bertara.
Azken hemezortzi egunetan Urberun izan diren bezeroei, beraz, COVID-19a hautemateko proba egiteko eskatu die Osasun Sailak. Bihar egingo dute baheketa masiboa, Eibar Ospitalean, 15:00etatik 21:00etara bitartean. Hitzordua, ordea, gaur eskatu behar da, ondoko bi telefono zenbakietako batera hots eginda: 943 032 644 edota 900 203 050.
Joan den ostiralean egindako PCR eta antigeno probetan 987 kasu berri baieztatu zituzten Hego Euskal Herrian. Osasun Sailak bihar argitaratuko ditu asteburu osoan zehar udalerri bakoitzean atzemandako kasu positiboak, eta eremu gorrian dauden herrien zerrenda ere eguneratuko du Eusko Jaurlaritzak.