Martxan da Euskaraldiaren bigarren edizioa, eta horrenbestez, egunotan, Hamaika arrazoi elkarrizketa sortako bideoak argitaratzen ari da Urolako Komunikazio Taldea (UKT). Zehazki, Urola Kostako 11 herritako aurpegi ezagunek euskararen eta Euskaraldiaren inguruko galderak erantzungo dituzte.
Hamargarren bideoa da gaurkoa, eta Roberto Gutierrez Ostarrena zine-klubeko kide zumaiarra da protagonista. Hamaika arrazoi sortako elkarrizketak Urolako komunikazio Taldea osatzen duten tokiko hedabideetan –Baleike, Karkara, Uztarria, Maxixatzen eta Zarauzko Hitza–, UROLA KOSTAKO HITZAren atari honetan nahiz Erlo Telebistan izango dira ikusgai egunero, 19:00etan hasita.
Aurreko egunetan Iñaki Gabarain txirrindulari ohi aizarnazabaldarrari, Aitor Arregi sukaldari getariarrari , Ixabel Jauregi euskaltzale azkoitiarrari, Iñaki Oliden idi-zale eta harakin oriotarrari, Juan Jose Eizmendi bertsolari errezildarrari, Ana Galarraga zarauztarrari, Naroa Agirre kirolari zestoarrari, Esti Markez abeslari aiarrari eta Xabier Arruti aldundiko Nekazaritza eta Landa Garapeneko zuzendari beizamarrari egindako elkarrizketak argitaratu ditu UKT-k.