Gutxinaka bada ere, gora doa COVID-19az kutsatutako herritarren kopurua. Urola Kostan zortzi kasu baieztatu ahal izan dituzte azken orduetan egindako PCR probetan. Zarautzen, esaterako, lau kasu gehiago detektatu dituzte, eta egunez egun handitzen doa gaixo kopurua, bederatzi egunez jarraian agertu baitira kasuak. Getarian, berriz, hiru kasu atzeman dituzte azken orduetan, eta bakarra Zumaian.
Araban, Bizkaian eta Gipuzkoan 4.930 PCR proba egin dituzte azken orduetan, eta horietatik 244 kasu positibo atzeman dituzte. Bizkaian nabarmen egin du gora kasu berrien kopuruak; 162 positibo baieztatu dituzte. Gipuzkoan 49 kasu izan dira, eta Araban, 29.