Handitzen doa Getariako fokuan positibo eman dutenen kopurua. Getariako Udalak konfirmatu duenez, zortzi dira dagoeneko positibo eman duten lagunak. Goizean zehar, uztailaren 9tik 12ra bitartean Politena tabernarekin harremana izan zuten lagunei PCR probak egin dizkiete Getariako kiroldegian. Orain Dona Doni izozki dendarekin zerikusia dutenei egiten zaie deia, koronabirusaren probak pasa ditzaten.
Azken egunetan hainbat pertsona identifikatu ditu Osasun Sailak, eta haien artean Getariako Kale Nagusiko Dona Doni izozki dendarekin lotura bat aurkitu du. Horregatik, uztailaren 9tik 13ra bitartean ostalaritza lokal horretan egon diren guztiekin harremanetan jarri nahi du Zaintza eta Kontrol sareak. Getariarrei bakarrik ez, Zarauzko eta Zumaiako bizilagunei ere dei egiten die sare honek.
Pertsona hauei, Urola Kosta eskualdekoak badira, beraien herriko osasun-zentroarekin harremanetan jartzeko eskatu die.
Getariako osasun zentroa: 943-14 06 53.
Zumaiako osasun zentroa: 943-00 64 90.
Zarauzko osasun zentroa: 943-00 79 99.
Bertan PCR proba bat egiteko aurretiko hitzordua emango zaie, bihar goizeko 09:00etatik aurrera. Proba horiek 09:00etatik 14:00etara eta 15:30etik 19:00etara bitartean egingo dira, Getariako kiroldegian.
Egun horietan Dona Doni izozki dendan egon diren beste herrietako bizilagunek 900 20 30 50 telefonora deitu beharko dute, edo beraien herrietako osasun zentroekin harremanetan jarri.