Bidasoa taldean jokatzen duten Jon Azkue oriotarra eta Kauldi Odriozola zumaiarra Espainiako selekzioarekin ariko dira abenduaren amaieran, Polonian jokatuko den Lau Nazio eskubaloi txapelketan.
Espainiako hautatzaile Jordi Riberak bi jokalari hauek eta Bidasoako atezain Xoan Ledo deitu ditu. Krakovia hiritik hurbil dagoen Tarnow herrian jokatuko da txapelketa, eta Poloniak, Bielorrusiak, Arabiar Emirerri Batuek eta Espainiako selekzioak parte hartuko dute.
Txapelketa abenduaren 27an, 28an eta 29an jokatuko dute. Lehen jardunaldian, Espainiak Polonia izango du aurkari, bigarrengoan, Bielorrusia eta azken egunean, igandean, Arabiar Emirerri Batuak.
Denboraldi bikaina
Irungo Bidasoa denboraldi bikaina ari da egiten. Gaur egun, Asobal ligako sailkapenaren hirugarren postuan da taldea, Bartzelonaren eta Ademar Leonen atzetik. Aurtengo Asobal Kopako txapeldunordea ere bada Irungo eskubaloi taldea, igandean Bartzelonaren aurka jokatutako finala galdu ondoren.