Zumaia eta Deba arteko tren zerbitzua etenda dago pasa den azaroaren 25etik, Itziar inguruan izandako luizi batengatik. Ordutik, bi herrien arteko garraioa autobus bidez egiten ari dira.
Trenez ordu laurden behar izaten da Deba eta Zumaia arteko bidea egiteko; autobusez, berriz, ordu erdi inguru. Horregatik, ordutegi berezia jarri dute konpontze lanek irauten duten denborarako. Astegunetan, eguneko lehen orduetan, hiru tren berezi izango dira Zumaian 07:12an, 08:12an eta 09:12an, Debatik autobusez datozen bidaiariek Donostiarako noranzkoan bidaiarekin jarraitzeko. Debatik Bilbora bidean, berriz, bi tren izango dira orduero.
Asteburuetan, autobusen eta trenen arteko loturak errazteko, orduerdiro izango dira trenak Zumaia-Donostia eta DonostiaZumaia lineetan. Zumaia eta Kukullaga (Etxebarri) arteko bidea autobusez egiteko aukera ere egongo da asteburuetan. Hori bai, Euskotrenetik iragarri dute autobus horiek trenaren geldialdi berberak egingo dituztela. Behin Kukullagara helduta, Bilbora jarraitu nahi dutenek berriro trena hartu beharko dute.
Sei hilabete, bi milioi euro
Zerbitzua berriro martxan jartzeko sei hilabete beharko direla aurreikusi du Euskotrenek, eta konpontze lanek bi milio euro inguruko kostua izango dutela kalkulatu du.