Arantza Toledo Cuencako piraguistarekin osatu du Irati Osa piraguista zumaiarrak ontzia, maila absolutuan K2an lehiatzeko. Txinako 11:15ean jokatu dute proba, hemen goizaldeko 5:15ak zirela. Aurretik 25,9 kilometroko estropada zuten parte hartzaileek.
Osak eta Toledok sekulako estropada egin dute. Txapelketa irabazi duen Hungariako ontziak eta Espainiako selekzioko bi piraguek aurrea hartu dute lehen minutuetatik. Lehen sei partzialetan denbora berdinean igaro dira hiru ontziak; segundo bat edo biko aldea besterik ez da izan beraien artean, eta azkenekoan bakarrik egin diete ihes beste bi ontziek Osari eta Toledori. Amaieran, bi ordu inguru iraun duen proban, minutu erdiko aldea besterik ez da izan irabazleen eta hirugarren egin duten zumaiarraren eta Gaztela-Mantxakoaren artean.
Irabazleak Zsofia Czellai-Voros eta Renata Csay hungariarrak izan dira, 1:56:30,22 denborarekin. Bigarren Espainiako Tania Fernandez eta Tania Alvarez izan dira, irabazleekiko hiru segundora (1:56:33,99), eta hirugarren Irati Osa eta Arantza Toledo, 1:56:56,72 denborarekin.
Ostiralean Txinako Shaoxing hirian dagoen Didang lakuan jokatu zuen 23 urtez azpiko munduko txapelketa Osak. Brontzezko domina lortu zuen proban, eta telefonoa hartu orduko oso pozik zegoela azaldu zion Baleike-ri. Irakurri artikulua hemen.