Uxue Trail mendi lasterketa jokatu zuten atzo, larunbata, Usurbilen (Gipuzkoa), eta eskualdeko hainbat korrikalari nabarmendu ziren lasterketan. Korrikalariek bi ibilbide zituzten aukeran, 11 kilometrokoa eta 20 kilometrokoa, eta Imanol Larrañaga azkoitiarra nagusitu zen proba luzean; ordubete 39 minutu eta sei segundo behar izan zituen 20 kilometroko bidea osatzeko. Gainera, proba berean, Jokin Gijarro zumaiarrak hirugarren egin zuen (1:42:38); Nerea Amibilibia zarauztarrak, berriz, hirugarren postua eskuratu zuen emakumezkoetan, 2:04:24 denborarekin. Bestalde, ibilbide motzean, hirugarren postuan amaitu zuen Mari Carmen Seijas azkoitiarrak; 1:13:23 denbora behar izan zuen 11 kilometroko ibilbidea osatzeko.
Guztira, 300 lasterkarik parte hartu zuten Uxue Trail proban; 143 lagunek ibilbide motza egin zuten, eta 134k luzea.