Traineru ligen aurredenboraldiko azken txanpan murgildu dira arraun taldeak. Gaur, igandea, aurredenboraldiko azken estropadak jokatu dituzte Lekeition (Bizkaia), eta bertan izan dira eskualdeko hainbat ontzi.
Emakumezkoen norgehiagokan 11 taldek parte hartu dute, eta Orio Arraunketa Elkartea nagusitu da. Hala, Lekeitioko 41. Bandera irabazi du gaurkoan. 22 segundoko aldearekin lortu du bigarren postua Hondarribiako ontziak. Zumaiako ontzia ere izan da lehian, eta bosgarren egin du. Datorren denboraldian, Euskotren Ligan jokatuko du OAEk, eta ETE ligan Zumaiak.
Gizonezkoen gaurko estropadei dagokienez, Donostiarra taldeak irabazi du. Guztira 21 ontzi aritu dira nor baino nor Lekeitioko uretan, tartean, Zumaiakoa, Orioko B ontzia, Zarauzkoa eta Getariakoa. Zumaiako arraunlariek zazpigarren sailkatzea lortu dute gaur (22:36:12), eta ZAEkoek bederatzigarren postua eskuratu dute (22:52:61). Orioko B ontziak hamaikagarren egin du (23:03:04), eta Getariakoak, aldiz, hamaseigarren.