Asteburu honetan jarriko dira martxan erremintako modalitate ezberdinetako Gipuzkoako Herriarteko pilota txapelketak. Eskualdeko lau herritako ordezkariek ekingo diote, horrenbestez, lehiari: Aiak, Azkoitiak, Azpeitiak eta Zumaiak gomazko paletan, eta Zumaiak zesta puntan ere bai.
Gomazko paletan, Aiak etxean Hernaniren kontra (20:00etan hasita), Azpeitiak Anoetan (20:45ean) eta Azkoitiak Mutrikun (21:00etan) jokatuko dituzte gaur lehen kanporaketaren joaneko partidak; Zumaiak, berriz, Irun hartuko du bihar Aitzurin, 11:00etan.
Zesta puntan ere etxean ekingo dio Zumaiak txapelketari, Mutrikuren kontra. Bihar arratsaldean jokatuko dituzte partidak Aitzurin, 16:30ean hasita.
Zestoa, erabakitzera
Esku-pilotan, Zestoa da momentuz Herriartekoaren lehiari ekin dion Urola Kostako ordezkari bakarra. Hain zuzen ere, gaur jokatuko dute zestoarrek Aretxabaletan (19:30ean) lehen kanporaketaren itzulikoa. Joan den larunbatean Zestoan lortu zuten 3 eta 0koa borobiltzeko eta hurrengo kanporaketarako txartela lortzeko asmoarekin joango dira Zestoako pilotariak Aretxabaletara.